Fotos (c) Ofelia de Pablo y Javier Zurita para proyecto Indómitas
Paula Mouzo é percebeira, casada con outra percebeira, Rocío; nai dunha nena, Vera. É a primeira muller candidata do PP a alcaldía de Camariñas.
Esta muller que rompe moldes nas filas conservadoras, Paula Mouzo Más, criouse nun negocio familiar, no popular barrio de Corea en Camariñas.
É unha profesional do mar, pero tamén unha muller creativa e tirada para diante, amante dos retos, da iniciativa. De moza foi cantante, gravou un disco. Sabe o que é o traballo de oficina e erguerse cedo para ir a obra.
Desde os cinco anos o seu hobby era vestir a funda azul e acompañar ao seu pai ás obras, a pasar cables. Os seus xoguetes, a caixa de ferramentas. O seu pai foi o seu mestre de electricidade.Aprendeu fontanaría co seu curmán e carpintaría co seu avó. Especializouse en deseño gráfico de mesas de cociña e montaxe.
A súa nai foi a súa primeira mestra de contabilidade, seguía a súa formación neste senso. Pero sempre lle gustou mais o traballo a pé de obra que a oficina.Bisneta dun percebeiro, muller dunha percebeira, tiráballe o mar.
Así embarcou nunha nova aventura vital e profesional con Rocío, gobernando unha embarcación; como percebeiras de Camariñas. Compraron a primeira embarcación aos «gemelos de Santa Mariña», os irmáns Baldomar. E tamén traballou a carón das percebeiras da confraría de Camelle. Coas súas compañeiras de Camelle, Arou, Santa Mariña.
Deportista desde nena, xogaba ao fútbol sala e agora ao fútbol no equipo local no estadio Irmás Patiño do seu pobo natal. Sabe do valor do sacrificio, o compañeirismo, o traballo en equipo na procura dun obxectivo común.
Actividade política
Leva catro anos como concelleira popular, gañando experiencia na faceta de servizo aos demais na política municipal. Unha muller brava e traballadora, ben coñecida polos homes e mulleres do mar de Camariñas, Camelle, Arou, Santa Mariña.
Asegura que quere «converter Camariñas na capital da pesca, o turismo e a economía da Costa da Morte». Critica «o desastre económico do goberno socialista de Camariñas que nos deixa 2,6 millóns de euros de débeda». E a perda de 2.000 veciños nas décadas de gobernos do PSOE.
E non dubida en pedir “un bo lanse” á Virxe do Carme para liderar un cambio político en Camariñas.
