O Concello de Fisterra expresou o seu total apoio aos mariñeiros afectados pola crise do badexo e culpou o Goberno central da falta de reacción ante unha situación que o sector considera insostible.
A concelleira de Pesca, Jénifer Suárez Silva, subliñou que o Executivo estatal actuou tarde e sen defender axeitadamente en Bruxelas os intereses dos profesionais galegos. “Os mariñeiros séntense abandonados por un Goberno incapaz de xestionar a crise do badexo, que se limita a trasladar prohibicións sen diálogo nin alternativas”, afirmou.
Revisión das restricións europeas, axudas económicas e diálogo co sector
O consistorio lembra que a redución das cotas está a ter un forte impacto no emprego e na economía local, e reclama tres medidas urxentes: revisar as restricións europeas, aprobar axudas económicas e abrir un diálogo real co sector.
“O Goberno non pode seguir dándolle as costas a quen xera emprego e riqueza nas nosas costas. Desde Fisterra defenderemos sempre aos nosos mariñeiros”, concluíu Suárez.
