O escritor e investigador Rafael Lema Mouzo presentará este venres, ás 20.00 horas, no Centro Mar de Sorrizo, en Arteixo, un inventario inédito de 4.470 sinistros marítimos rexistrados nas costas galegas. A intervención, titulada «A costa de 4.400 naufraxios», enmárcase nas «Xornadas sobre mar e naufraxios» que se celebran o venres 21 e o sábado 22 de agosto e adianta un traballo que o autor, natural de Ponte do Porto, prevé publicar en setembro.
O novo catálogo case dobra o inventario de 2.300 barcos que Lema deu a coñecer no Ateneo de Madrid en 2013. Segundo o investigador, o aumento débese a novos apuntamentos sobre afundimentos das dúas guerras mundiais, á revisión da prensa internacional entre 1850 e 1950 e á anotación de sucesos ocorridos en augas de xurisdición española. A maior parte dos casos concéntrase na costa coruñesa, entre Bares e o sur de Fisterra.
Naufraxios con nome e crónica
«O catálogo contempla naufraxios con nome e crónica, non restos dispersos ou non identificados, ningún tramo de costa europeo ou atlántico pode acreditar esta cifra», afirma o autor, que rexeita a lenda negra sobre afundimentos provocados polos habitantes da Costa da Morte, «con datos e non con contos».
O programa arranca o venres ás 19.00 horas coa charla «Naufragios en el mar de Sorrizo», a cargo de Marcos Amado, director do Arquivo de Pesca de Caión. Ese día tamén intervén Lema Mouzo. O sábado interveñen Gerardo Triñanes, coa conferencia «Un mar de madera», sobre a construción naval en madeira en Galicia, e o arqueólogo submarino Antonio López Arenas, que abordará o papel do cruceiro Blas de Lezo na Guerra Civil chinesa.
As xornadas están organizadas polo Concello de Arteixo con financiamento do Fondo Europeo Marítimo de Pesca e Acuicultura e da Consellería do Mar, a través das axudas xestionadas polo GALP Golfo Ártabro Sur. A entrada é gratuíta ata completar o aforo e cada sesión pecharase cunha degustación de produtos do mar.
