O BNG expresou a súa satisfacción tras coñecer os plans do Goberno central para reforzar o Servizo de Vixilancia Aduaneira na Costa da Morte cunha nova unidade administrativa en Cee, mantendo ao mesmo tempo operativas as instalacións actuais de Muros.
A formación nacionalista considera que a decisión atende unha reivindicación histórica da comarca e permitirá mellorar a vixilancia marítima nun tramo litoral que viña reclamando maiores medios fronte ao narcotráfico e outras actividades ilícitas.
Segundo a información trasladada polo Executivo, o novo modelo contempla unha base estable no porto de Brens, en Cee, así como o despregamento de embarcacións en distintos puntos da zona. En concreto, está prevista a operatividade de tres unidades: unha semirríxida cabinada Rodman 33, un patrulleiro de altura Rodman 101 e outra embarcación semirríxida non cabinada.
A patrulleira de maior tamaño tería a súa base en Brens e asumiría actuacións en mar aberto, mentres que o resto dos medios complementarían os labores de vixilancia nas rías de Muros, Corcubión e Camariñas. Ademais, a zona norte contaría con apoio desde a base marítima da Coruña.
Unha demanda histórica
O deputado do BNG no Parlamento galego Óscar Insua sinalou que se trata dunha demanda longamente formulada pola comarca. “Por fin logramos unha demanda histórica da comarca. Agora instaremos ao Estado a que se efectivice o máis axiña posible”, afirmou.
Insua engadiu que a formación continuará vixiando o cumprimento do anunciado e reclamou que os medios sexan suficientes para a zona. “Agora imos seguir traballando para que entre a funcionar canto antes a unidade administrativa, e para que traian unha patrulleira en condicións”, indicou.
O parlamentario nacionalista asegurou tamén que este avance responde ao traballo desenvolvido nos últimos anos. “Estes logros son os que fan útil ao BNG na Costa da Morte”, manifestou.
Desde o BNG tamén reclamaron que os medios asignados respondan ás necesidades operativas reais da comarca.
